Koken met Keen

Nao twei verhaolenbundels wag Keen zuch an een kookboek met verhaolen. De recepten hef e van zien femilie en ok van koks die e tiedens zien reizen in het boetenlaand sproken hef.

De Sligro in Emmen vun het een hiele eer um de boekprissentaotsie van 'Koken met Keen' te regeln. En dus zaten vrijdag 26 november een dikke virtig man- en vrouwlu boven in de horeca-groothandel. Schriever Roelof Keen oet Klazienaveen hef zien eerste 'kookboek met verhaolen' schreven. Het schiere tiekenwark is van zien kameraod Gerrit Pomp oet Schoonebeek.

De chef-kok van de Sligro har slim zien best daon. Veer keer kwammen der happies oet het boek van Roelof veurbij. Van gesteufde peerties en een ballegie gehakt tot Japanse beef tataki en een Provençaals steufpottie. Boetendat kwam de vinoloog ok nog ies met passende draankies anzetten. Op de oetneudiging stun niet veur niks: kom met een lege maag. Tiedens de eterij was der meziek van Bert Kling. Het weur een feestelijke middag met veul kedogies veur Roelof en Gerrit.

Het eerste exemplaar kreeg old-journalist Jan Wierenga oet haanden van Roelof Keen, umreden dat Roelof de verhaolen van Lamert Kieft (pseudoniem van Jan Wierenga) in het Dagblad van het Noorden zo lieden mag. Roelof har zölf een parodie op Lamert Kieft zien verhaolen schreven. En daor weur slim um lacht.

Het kookboek met verhaolen en tiekenings lig veur € 22,50 in de boekhandel en is te bestellen in de webshop van het Huus van de Taol. Kiek ok op: https://www.huusvandetaol.nl/product/koken-met-keen-roelof-keen/