Kalavateren

Da's et olderwetse woord veur Circulaire economie... iets een tweede leven geven of de grondstoffen hergebruiken. Das anno 2022 heel modern. Ministers van allerhande zaken sprekt zich d'r oaver uut in dagelijkse praotprogramma's. Frisse uutvinders die hun pas ondekte snufjes verkondigen. Geliek al hebt ze et wiel opniej's uugevonne.

Now... ik heb niej's veur disse wies (leas snot) neuzen die nao 1990 geboren zun. In de joaren toen wie'j opgruuien (en ik zol et breed hol'n '50' 60 '70 tut half 80, oké?) Was er altiet sprake van een circulaire economie.. En dan veural biej de grote gezinnen van Jan met de Pet.

As iej de tweede geborene was dan kreeg iej alles van den eerst geborene. Den derden van de tweede, enzo verder. Dat beteken'n meestal, as iej den derde waar'n dan wast ook al wel echt versletten! Ons vader kon alles maken, qua fietsen en grei en hie'j zurgen d'r geliek veur.

Innovatieve vernieuwingen

Anpassingen: Was bv de fietse te hoge, dan zette Pa d'r kleinere wieltjes an. Was de fietse te leag, dan lassen pa een halve meter bie'j an de zadel pinne. Wel was ie'j wat afhankelijk van 'et gedrag van ow oldste bruur of zus. Was dat 'ne wilde bras, dan waren de bandjes al aardig glad van 't slippen en leer'n ie'j snel umgoan met selutie.

Moeder stukken de kleer'n net zolang uut tut ze d'r weer gaar'n van spinnen kon. 'Kalavateren' nuumen wiej dat.

't Grei weer iets opkalavateren...

Uutzonderingen doargeloaten. In een trop van jongs ha'j geluk ai et eenigste deerntjen was. Of andersumme. Da hoef ik wieters toch zeker nie uut te leggen?

Trouwens bunk wel bliej dak ze neet de kos hoef te geven wie der met een spiekerboks ant gat liep woarvan de knope andersumme zat.

Deze circulaire economie zurgen der ook veur daw mekaar respecteren en zo goed of kwoad as et ging te helpen. We waren beweageluk, mager, nooit ziek, gold eerlijk en belhamels.

Bruurs en zusters ko'j met opschieten... of op schieten... zo was dat en dat zol altiet zo blieven..

Veur al onze jeugdige wiesneuzerige ministers as letste. Um disse vorm van circulaire economie te snappen moi eerst, 'circulair goan denken'. Moar dat kump in jullie Lineaire economische levensstijl niet an de orde. Goed veurbeeld geven dut goed volgen. Vroag moar an mien oldste bruur.

Maak ik ff een paar klusskes op de trappers veur de jongste.

Ajow!

Jos Salemink.